Советот за развој на пелагонискиот плански регион, тело во кое членуваат деветте градоначалници на општините Битола, Прилеп, Крушево, Могила, Новаци, Ресен, Демир Хисар, Кривогаштани и Долнени ја усвои програмата за работа во периодот 2015-2019 година. Прва точка на дневниот ред на шестата седница на Советот беше отпочнување на соработка со УНДП за воспоставување на мрежа за регионален развој:
„Со УНДП започнуваме еден нов проект кој што ќе значи создавање на мрежа која ќе ни овозможи аплицирање на фондови кои ќе се однесуваат на туризмот и на иновацијата. Едниот од нив е околу 18 милиони долари, а другиот околу 9 милиони долари, но за сето тоа да се направи со УНДП веќе имаме финансиска поддршка од 40 илјади долари, што значи 10 000 долари обезбедуваат општините, а 30 000 обезбедува УНДП. Апликациите се подготвуваат и се доставуваат во одреден временски рок, а потоа се избираат проектите кои што преку грантови за општините ќе бидат финансирани“, изјави градоначалникот на општина Битола, д-р Владимир Талески.
На денешната седница меѓудругото беа презентирани и резултатите од соработката со Карана Корпорација, статусот на проектите од Грантовата шема базирана на резултати (ГИЗ РЕД), како и измената и дополнувањето на годишниот финансиски план на ЦРППР за 2014 година.