На голема радост на најмладите, во прекрасна атмосфера, како дел од Програмата по повод „4 Ноември“ – Денот на ослободувањето на Битола, синоќа на Нова сцена во Центарот за култура, Бабец театар од Битола, ја одигра театарската претстава „Јованче и Марика“.
Со оваа претстава на децата им беше понудена една нова визуелизација на нивната добро позната бајка за прв пат запишана од браќата Грим, познатата приказна за двете деца кои таткото присилен од страна на неговата жена, односно маќеата, ги испраќа и ги остава во мрачната шума поради финансиските проблеми и снаодливоста на двете деца но и нивната желба за промена на тешкото бреме кое без никаква вина мора да го носат на својот грб.
„За нас беше огромна инспирација за да направиме еден нов и современ прочит на оваа пред се хорор бајка во која внесовме многу свежина, комични наместо страшни ситуации и решенија, драматуршки заплети, многу танци и класична музика и едно ново визуелно решение на сценографијата и костимите поткрепени со многу магични визуелни ефекти кои треба да придонесат за едно незаборавно доживување на децата.
Целта на оваа претстава е на децата да им покажеме дека со многу љубов и грижа еден кон друг стануваме многу посилни и дека секоја авантура не учи нешто ново, но дека најважно од се е да научиме да го разликуваме злото од доброто“, вели режисерот на претставата, Васко Мавровски од Бабец театар.
Улогите ги толкуваа Никола Пројчевски, Јулијана Мирчевска, Петар Спировски и Катерина Аневска.