Општина Битола ја потврдува транспаретноста во работењето и за првпат во постоењето на фестивалот БИТ ФЕСТ, пред неговото официјално завршување, јавно ги објавува предвидените суми за поддршка на учесниците во фестивалот.

Селекцијата на годинешните учесници на фестивалот БИТФЕСТ ја вршеше селекторски тим со компетентни членови од одредени области. Пред почетокот на фестивалот, градоначалничката м-р Наташа Петровска истакна дека годинава вкупната сума за фестивалот ќе биде неколку кратно пониска од изминатите години.

„Вкупно од одбрени средства во програмскиот дел се 5 240 000 денари и тоа: 3 240 000 денари од буџетот на Општина Битола и за првпат 2 000 000 денари од буџетот на Република Македонија. Вкупната сума е неколкукратно пониска од минатите години, не затоа што не треба да се троши, туку затоа што природата на трошоците има карактер на класифицирање по приоритет. Една локална самоуправа, мора да мисли на сите аспекти на животот во општината, од култура до инфраструктура“, посочи Петровска.

Годинава општината, со познати суми ја продолжи поддршката на традиционалните настани и на изведувачите, од кои ги издвојуваме Виолета Томовска и фестивалот Илинденски денови, Исмаил Лумановски, групата С.А.Р.С.која настапи во рамките на фестивалот Битола отворен град, Шекспир Фестивал, Широк Сокак во бело итн.