Дворот на Општина Битола вчера беше локацијата во која се собраа настсвниците по физичко воспитување и директорите на основните училишта да ја примат донацијата која во пресрет на детското издание на трката МИНИ ТРЧАЈ БЕ ја обезбедија организаторите на познатата градска трка ТРЧАЈ БЕ и Атлетската федерација на Македонија. Ова е одличен гест од нивна страна за донирање на основна атлетска опрема на 12 основни училишта од Општина Битола и 3 основни училишта од Општина Могила.
Во периодот на кампањата за пријавување на трката, како поддршка за заедницата, организаторите на трката донираа и 50 стартни пакети на децата од социјално ранливите семејства, обезбедувајќи и тие деца да имаат можност да учествуваат и да уживаат во трката.
Оваа донација е искрена поддршка за децата, но и за едукаторите за нивната посветеност на негувањето на младите атлетски таленти. Никола Димитровски, претставник на ТРЧАЈ БЕ, Димитар Петровски, секретарот на Атлетската федерација на Македонија и градоначалникот Др. Тони Коњановски беа присутни заедно со поканетите гости, да го прослават овој значаен придонес за заедницата.
„Среќни сме што ги поддржуваме нашите училишта и им ги обезбедуваме потребните алатки за поттикнување физичка активност и здрав живот.
Битола е град на атлетиката, имаме славна историја на АК Олимп, која беше заборавена, а со стартот на ТРЧАЈ БЕ пред 6 години го возобновивме клубот во кој денес членуваат деца кои не се враќаат од натпревар без освоен пиедестал, со што сјајот на атлетиката на Битола е целосно вратен. Детското издание на ТРЧАЈ БЕ е повеќе од обична трка, тоа е празник за децата и прослава на иднината на нашите млади спортисти“ – истакна Никола Димитровски организатор на ТРЧАЈ БЕ.
Димитар Петровски, секретар на Атлетската федерација на Македонија пред присутните истакна:
„Оваа заедничка иницијатива на АФМ и Трчај бе е доказ за нашата посветеност да негуваме млади таленти и да ја промовираме атлетиката низ сите заедници. Горди сме што стоиме со Општина Битола во овој потфат, а се израдувавме и на интересот на трите училишта за негување на овој спорт од Општина Могила. Ателската федерација на Македонија негува посебна програма за најмалдите и ова е само уште еден доказ за нашата посветеност”.
Градоначалникот на Општина Битола Тони Коњановски ги поздрави присутните и се заблагодари за иницијативата:
„Денешниот настан е светол пример за тоа како соработката и духот на заедницата можат да направат вистинска разлика. Горд сум на нашата општина што го поддржува здравјето и спортскиот развој на нашите деца. Со нетрпение очекуваме да ја видиме радоста и возбудата на лицата на нашите млади учесници оваа недела“
Во недела, на 9 јуни од 11.00 часот да ги бодриме нашите млади тркачи и да славиме поздрава, поактивна иднина за нашата заедница!