Градоначалникот на Општина Битола, денес оствари посета на градежните активности на стадионот под Тумбе кафе. Изградбата на северната трибина се одвива според предвидената програма и динамика за реализација на проектот: „Се наоѓаме на местото каде што се гради северната трибина од Стадионот под Тумбе кафе. Минатиот период, направивме проект кој што значи изградба на стадион под Тумбе кафе со капацитет за 12 000 гледачи. Јужната трибина ќе се реконструира после завршувањето на северната која е направена по европски – светски стандарди за да може да се одржуват меѓународни натпревари. Тоа значи дека ќе има посебни ложи за судиите за директен пренос и сите други потребни содржини. Во оваа фаза, завршена е целата инфраструктура под објектот, така што за скоро ќе биде турена основната плоча врз која ќе почне да се гради северната трибина. Таа нема да се заврши оваа сезона, но најважните градежни активности ќе се завршат. Проектот е предвиден во повеќегодишните програми и го финансира Општина Битола. Очекувам веќе следната градежна сезона новата локална самоуправа да ја заврши северната трибина, а следните две години и целиот стадион“, изјави градоначалникот на Општина Битола, д-р Владимир Талески, изразувајќи верување дека овој проект ќе остане приоритет на идната локална самоуправа во интерес на сите љубители на спортот, како и заради потребите на ФК Пелистер. На денешната прес конференција градоначалникот потсети и за сите други градежни активности кои се реализираат на повеќе локации.