Во координирана активност на Советот за превенција при Општина Битола заедно со Републичкиот совет за безбедност во сообраќајот на патиштата (РСБСП), во основното училиште „Даме Груев“ на провоодделенците им беа поделени едукативни материјали во фунција на зголемување на нивното знаење од областа на сообраќајот.

„Се радувам што имаме една ваква активност која што потврдува дека Советот за превенција во Општина Битола функционира онака како што е повикан да функционира. Она што Општина Битола го има како сообраќајно решение и е во функција на нашите ученици, е поставувањето на воздушни перничиња на улицата „Васко Карангелевски“ пред училиштето „Елпида Караманди“ и воздушните перничиња како соодветно сообраќајно решение кои ќе бидат поставени на улицата „Македонска фаланга“ пред Медицинското училиште во Битола. Дополнително ќе следуваат нови сообраќајни решенија за училиштето во Горно Оризари и токму во таа насока и треба да се движиме затоа што безбедноста на младите е пред се“, посочи градоначалничката на Општина Битола м-р Наташа Петровска.

Претставниците од СВР Битола, Општина Битола и РСБСП разговараа со првоодделенчињата за правилното движење по тротоарите, начинот на преминување на улиците и др. Сепак и на таа возраст, децата забележаа дека возрасните не треба да ги паркираат автомобилите на тротоарите.