Во Битола, денес се одбележа Денот на помирувањето по Првата светска војна и француско – германското зближување, традиционално на Француските гробишта.

Заеднички, францускиот амбасадор Сирил Бомгартнер и германската амбасадорка Петра Дрекслер, положија свежо цвеќе, со што симболично застанаа на патот на подадената рака, пријателството и блискоста.

Свежо цвеќе положија и градоначалникот на општина Битола, Тони Коњановски, претседателката на советот на општина Битола Габриела Илиевска, претставници на дипломатскиот кор, Армијата на Република Македонија и други делегации.

Како дел од комеморативните настани за одбележување на помирувањето и француско – германското зближување, градоначалникот на општина Битола, Тони Коњановски, денес оствари средба со амбасадорката на Германија Петра Дрекслер во неговиот кабинет.

На средбата, беше нагласено, дека токму ваквите настани на сеќавање и споменување, се насочени кон градење на подобра заедничка иднина.

Како веќе докажани партнери, верувам дека ќе реализираме уште многу заеднички соработки, проекти, културни настани , истакна на средбата градоначалникот Коњановски.

Амбасадорката на Германија Петра Дрекслер, нагласи декa потврда за одличната соработка е и една од најголемите германски фабрики, Кромберг и Шуберт, која во општина Битола, беше отворена во 2013 година, а денес брои над 6000 вработени.